شُرفة الغفلة ..

شُرفة الغفلة ..

؛
ماهو صحيح إن المسا
في شُرفة الغفلة نسى
أيامنا ..
ماهو صحيح
لارفرف الطير الجريح
وخطف من الشباك
جُل أحلامنا ..
هو الأسى /
يمكن شرب حفنة مواجع
ويمكن تدفى ببارد الجدران
واشقته الأماكن والمرابع
الله يرحم حالنا ..
الليل عشمنا كثير
يرسم على خطوط الشقا
حظٍ وفير
ونحلم ننام بريش حُر
وحنا على وجه الحصير
نرتب أقصى أوجاعنا ..

ياصاحب الظل
مابه أحد يمحي زمان الصمت
في ظل المحن
حتى المواويل
لما تجر الصوت تبكي لك وطن
حتى أنا أنزف شجن ،!
وإنت عذاب أشواقنا
ماهو صحيح إن الصباح
يلوّن عيون الجراح
ويهمس لها / لاتفتحي الشباك
يمكن ياخذك لهناك
وابقى وحيد يالله غفّي
اسدلي أهدابنا
ماهو صحيح إنك تكون
القاضي والجلاد
في نفس البلاد
وإنت أكثر قلب تدري
وش كثر حنا بعاد
و ياكبر آلامنا ..
الاماكن عارية
والدروب .. اللي مشيناها سوا
وقلنا عنها مانتوب
عنا ماهي دارية
والسما كانت تنادي
لين مدت بالمطر
بيض الايادي
واغسلت أسرارنا ..
ياجنون الريح
ضمي إنكسار المتعبين
علميهم كيف قصر الرمل
يتباهى وهو مخلوق طين
وحنا فعلا راجعين
وتنتظرنا ادراجنا ..

ياصاحب الظل
الوطن قلبك
وانا من دون قلبك أُعتبر
في عداد المتعبين !
ماتضم الريح فيني انكساري
وانت داري
إني من غيرك حزين .!
حتى الفرح عابر
ولايجبر كسور البعد
في أرواحنا ..

ياصاحب الظل
بس أعطيني جواب
هو صحيح إن المسا
مهما تعدانا ونسى
يقدر يرد أحبابنا ..؟!

للمزيد من مواضيعي