كل حاجة ممكنة

كل حاجة ممكنة

فرحة ومـا تمت.. وعمرٍ ضـاع.. والعالم سكوت،
هـدوء مُستَغرَب.. ولكـن: (كـل حاجـة ممكنـة)!

حايـر!! وتسألني وش اللي طيّح كبار البخوت؟!
شاللـي توقعته وأنـا قِسمـي مـن العمر أحزنـه؟!

سكوت كل العمر في حضرة جناب الحزن موت
سكوت وأنـا اللي أهاب مـن الحكي وأستهجنـه!

سكوت لامنـه حضر جرحـي وداراه: (السكوت)
سكوت لامنـه سـقـط قلبـي وحـاولـت أحضنـه!

سكوت لاجيـت أستر الدمعـة وأنـا كلـي غموت
سكوت وآلامـي مـن الماضـي كبيـرة.. مزمنـه..!

سكوت وأنا أهرب من همومي أحسب إني نجوت
وأثّـر الكئـابـة ويـن مـا لقّيت وجهـي.. تسكنـه!!
سكوت يومه قـال أنـا جنبك ولـو حلّ السكوت
مـا كـان يدري لاسكـت يدمـي الفـؤاد ويغبنـه!!

سكوت لامنـه تـكـلـم.. ودي أكـتـم كـل صـوت،
وأسمـع علـومـه كلهـا.. وأقطـع جميـع الألسنـة!

حنـا جماعـة (قلبنـا) دايـم لـه نحـس بـ قنوت،
وإليـا (كفـر) 'عقل البنادم فـاي مبدأ' (نؤمنـه)!

سكوت لـو قـلبـي غـفـر زلّـه.. وخـلاهـا تـفـوت،
سكوت دام 'أشجع' عباد الله في الحب 'أجبنه'

سكوت لا قالوا وطن، مامن وطن، فضلاً سكوت
أنا اللي تهت من المنافي.. والوطن.. والأمكنـة..!

سكوت لامنـا تشردنـا ... ويسكـن بـ اليـخـوت:
اللـي (تسبـب فـي تشردنـا) و (عبّـى مخزنـه)!

غربـة ورا غربـة ورا ضيقـة ورا عسـر وبهـوت،
ياليت همي فـي يـدي يمسي بـن آدم وأدفنـه.

مع كـل وهج من الفرح لمحه مليئة بـ الخفوت
اللـه يـقـطـع دابـر الحـزن المبـدّى مـاشيـنـه!!
سكوت لا قالوا أمـل منه سخطت ومـا عفوت
فـي وادي الآمـال ركـن مـن المآسـي أقطنـه!!

أنـا وصلت لـ مرحلة حتى عتابي بـ السكوت!!
الفضفضة والضحك حتى الشعر فيني أسجنه

ياخي تعبت من الحكي، أو لا. تعبت من السكوت
مـدري.. ولكنـي تعبـت.. وكـل حاجـة ممكنـة!

كبرت لكن ما كبر فيني سوى حب (السكوت)!
أسكت إذا عمري فرح وأسكت إذا صرت أحزنه

للمزيد من مواضيعي