هجين تجار الدم

هجين تجار الدم

ياترى بعد مبتحط القنبلة ...
وتسمعها بودانك ... وتشوفها بعينيك ...
فرتكت كام واحد ... اللي قطعت دراعة ... واللي رجله ...
واللي شقته نصين ... ونافورة الدم ابتلعت المكان ...
والناس مخضوضة مذعورة مصدومة ...
من بشاعة المنظر ووحشية الانسان ...
ياترى بتشوف ده كله ... بيوصلك ... بتحسه ... بتشعر بيه ... بيأثر فيك ...
ولا عادي طبيعي ... وبتكمل يومك وبتعيشه ... ولا كأن فيه حاجة حصلت ...
ولو كنت بتصلي بتدعي بإيه في صلاتك ...
يسترها عليك ... يغنيك ... يشفي مرضاك ... ويحبب خلقه فيك ...
بتقول لربنا إيه ... في لحظتك دية ... بتطلب منه السماح ...
يرحمك ... يغفرلك ...ولا ايه ...
ولما بتقعد مع صحابك ونَاسك ... بتضحك كده وتهزر اخر روقان ...
بترد علي ده وده تكبر ... وده تلضمه في سبحتك قوام ...
ولما بتجوع ... ياتري بتاكل بنفس مفتوحة ... بتمضغ لقمتك بالراحة ...
بتستطعمها ... مالحة جارحة ... مهضومة ...
وعيالك بتبص في عينهم ... بتشاغلهم ... بتجيب حاجة حلوة معاك ليهم ...
بتقعد كدة وسطيهم ... فرحان بيهم ... وبيك هايصين ...
وساعة النوم ياتري ... بتترمي علي فرشتك كده من غير تفكير ...
ولا بتعاشر حتتك ...ولحظتك بذمة خالصة ... بضمير ...
وياتري بيجيك النوم علي طول ... ولا بتاخد وقت ودماغك شغالة ...
صحيح هي بتشتغل دماغك ... يعني بتفكر ... بتسألك وبتسألها ...
بتاخد وتدي معاها ...
ولا فيك مبتسألش ...و تسيبك وتنام ...
وتبدأ تاني يومك ... وعينك علي تليفونك ...
مستني تعرف ...
هتدبح مين النهاردة ...
هتيتم مين النهاردة ...
هتحرق زرع مين ...
وقلب مين النهاردة ...
والسبب انت نفسك مش عارفه ... ولا فاهمه ... ولا شاغل بالك بيه ...
انت همك كله نفسك ... اللي حرقت انسانك ...
حقيقي انت مش بشر ...
ولا حيوان ...
انت هجين ...
صنعوك تجار الدم ...
من جهل وحقد ...
وفكر لعين ...
حسبي الله ونعم الوكيل ...
فتحي عيسي

للمزيد من مواضيعي