مالها العزوبية عامية ساخرة

مالها العزوبية عامية ساخرة

ساعة كدة ...
وساعة كدة ...
وكل الساعات مش هيا ...
راكبة الدلال ...
وسايقه العنجهية ...
بخفة دم اطعم من الحلاوة الطحينية ...
بغلاسة الهم والغم والليلة السودا اللي مش معدية ...
ملامحها في الزعل غير ...
وفي الروقان ملائكية ...
وبين البينين قمرين ... رسموها علي شوقه ...
احلا وليه ...
كوز عسل مصبوب ... قالب عجمية ...
وروح ترد الروح ... وتموتها كل شوية ...
متعرفلهاش عنوان ...
ولا خريطة تفصيلية ...
لو زهقت طفشت ايام ... في اوضتها الجوانية ...
ولو فرحت ولعت ... في الحيطان وف العيال شماريخ السعادة الدولية ...
وهاتك يا حنان ...
نفسي اعرف معجونة من ايه ...
الحسن منها اشتكي ... والحزن بيبكي عليه ...
جربت أدادي اللي باقي من عقل فيا ...
أرفع همة الدلع ... واسقيه من شفشق الملاغية ...
وانزع فتيل الطمع من لوحة الوجع والأسية ...
ومن قلب الغضب ضفيرة اللهب ورباط الضحية ...
يمكن الصنف يعجب وتهدى الامور ... والمودة تغلب والعشرة تمون ...
والعدس يبقي ملوخية ...
صحتني وانا ف سابع نومة ...بحلم برغيف الحب ... وغموس الحنية ...
اتنطرت من فرشتي مفزوع ...
من صوت الشروع ... في قتل المعنوية ...
وهيا بتقول ...
قوم يا حنين ... هات الفول ...
ومتنساش الطعمية ...
وانتي يامنيلة استعجلي ...
اخوكِ عايز الحمام ...
قطيعة ...
تقطع الجواز وسنينه ...
مالها العزوبية ...
فتحي عيسي

للمزيد من مواضيعي