تناسيت

تناسيت

تناسيت لي فترة لعل الأمور (اِتْزِين)
نسيت المواجع بَاْسفل الصدر مِنْقَبْرَة


أنا داري اِن الأمر حاصل ولو بعدين
يجيبه لك اللي ما توقعت له دبرة


وبعض المواقف لو تعَرْفَه مِنَ اوَّل زين
تِكَشَّف لك الموقف تِقِلْ ما معك خبره


ودنياك هذي كلها يا سلف أو دين
ويا كم رُوس اليوم بالقاع مِنْثَبْرة


ترفَّق بعمرك دام فيها مجال اَلْحِين
قبل لا يذيقك وقتك المر من صبره


وهمَّك يِذَوّبْه الصَّبُر لو يدوم سنين
ومهما كبر يصغر ولو كان يا كبره


نعيش المواقف كلها زينها والشين
وناخذ مِن صروف الزمن دائما عِبرة


مشينا ولا قلنا لِخطْوَاتنا مِن وَين
كتبنا لَوِن اِلهامنا ناشِفٍ حِبره


سكتنا لِأنَّا نعرف اِنْ التِّشكي شين
وكسر الخواطر أمر ما يُنتَظر جبره


عزيز العرب لوكان في الخاصرة سكين
يفل الحجاج (اِتْقول) ما خزته إبرة


ختاماً يُقال السِّر لا جاوز الإثنين
يعيش ويلاحق صاحب السر في قبره



سُهيل

عبدالله الصقري ,النداوية ,من أجل عينيك ,وارف ,ليان ,fateenah ,❀مـهـرة الـشعر❀ ,الْياسَمِينْ معجبون بهذا

الموضوع الأصلي: تناسيت || الكاتب: *** سُهيل *** || المصدر: اسم منتداك

www.domin.com

كلمات البحث

العاب ، برامج ، سيارات ، هاكات ، استايلات

المصدر: منتديات مدائن البوح