منتديات مدائن البوح - فيني هدوء الكون وفيني جنونه

منتديات مدائن البوح (https://www.boohalharf.com/vb/index.php)

- سحرُ المدائن (https://www.boohalharf.com/vb/forumdisplay.php?f=7)

- - فيني هدوء الكون وفيني جنونه (https://www.boohalharf.com/vb/showthread.php?t=855)

فيني هدوء الكون وفيني جنونه

فيني هدوء الكون وفيني جنونه

*****************

يا كاتبه وصفك لمن يجهلونه
صدفه قريته والمعاني به اجزال

(فيني هدوء الكون, وفيني جنونه)
هذا تحدي قبل ما يكون مرسال

منقول والا وصف لمن يحترونه
والا هو التعبير عن واقع الحال

الكل له خيار بكامل شئونه
والكل له حرية القول وافعال

كم من مترجم واضحه به فنونه
ترجم خفايا لروح واللي على البال

متأكدٍ من خافقه ما يخونه
أكيد تأكيده كما رزة اجبال

يعيش عقله مهو عالم ظنونه
مهو مثل منهو مع الريح لن مال

صريح مع من دايمٍ هم يبونه
ولا يتلعب بالمعاني والاقوال

توقعٍ من ناس ما يعرفونه
توقعي واظن هو منها نال

كني اشوف الليل غطى امتونه
كني اشوفه ناف عن كل الازوال

كن الجمال اخاف من يوصفونه
وسهوم عينه فاقت وصاف الابطال

يا بنت عندي بعض مافيك لونه
فيني فصول العام وبالوصف رحال

فيني انسان وفطرتي بي مصونه
عندي ترى موروث من عدة اجيال

فيني صفو الحب فيني شجونه
والحب عندي شكل مو عدة اشكال

فيني جمال الورد وخضرة غصونه
وفيني قمر ساطع مع الجو يختال

وفيني جمال الشط وفيني فنونه
حيث ان هدوء البحر, للهم حلال

فيني نسايم ليل بهمسه حنونه
مرسال من هو غاب والبعد به طال

وترى لغات الكون فيها مرونه
ويترجمه ناياً معه صوت موال

والوجه الاخر قلت يالله عونه
فيني هموم وخافقي بيه زلزال

فيني غريب الدار يمشي بهونه
ما هو بكيفه بالتنقل وتجوال

فيني امل والياس بيني ودونه
وفيني تفاءل صار قصرٍ على رمال

نعم...امل؛ لكن غمض عيونه
حتى ايقنت الحال ما تسوى اريال

فيني ظلام الليل وفيني سكونه
غاب القمر وتسكرت كل الاقفال

فيني هياج البحر, بكل مخزونه
يومن طغى والموج عالي وقتال

فيني ذبول الورد غمض اجفونه
ثم اختقى والعطر منه فنى وزال

أخذ وعطأ وكلٍ يسدد ديونه
والا ترى بالكون ما ضل نزال

بقلمي: عواد الهران